Марий лӱман ателье

«Сайвер» ателье 1993 ий сентябрь годсек  пашам ышта. Тушто тӱрлӧ  национальный костюмым, сценылык вургемым, тувырым ургымо дене пырля эше нуным тӱр дене сӧрастарат.

Тыгак ӱмбал вургемлан, ужгалан, пальтолан, шӱштӧ курткылан у сыным пуртат, тачысе модылан келыштарат. Тиддеч посна, тӱрым кучылтын, аралтышым, телефонлан чехолым, галстукым, шарфым да молымат ямдылат. Чыла тиде пашам Ольга Михайловна Бурдина виктара.

Ательеште вич ургымо цехыште латкандаш пашаеҥын кидше йымач тыгай моторлык шочын лектеш. Шинчам веле огыл, чонымат куандара. Тӱрым тӱрлымӧ паша, мутат уке, неле, тӱткылыкым, чытышым йодеш. Тудлан эн ондак тӱрым калькеш сӱретлыман, вара материалыш кусарыман. Кусарымеке, тӱрлаш тӱҥалман. Вургем 3-4 кечыште, арня жапыште ямде лиеш. Тидыже тӱрын кугытшо, чотшо деч шога. Вашкеда гын, кок кечыштат урген шуктат.

«Сайвер» ательешке заказ марий-влак деч веле огыл, моло калык дечат пура. Марий кундемыш толшо уна-влакат сувенир семын марий калык костюмым тыште налыт да шкеат кумылын чият. Тыге тиде ательен сатужым Америкыш, Австрийыш наҥгаеныт. Россий мучко Ямал-Ненец автоном округышто, Ленинград, Моско, Челябинск областьлаште, Сургут кундемлаште шарлен.

Урген, тӱрлен мошташ да шке пашам почаш шуко вийым пыштыман. Тудым виктарен колтымаште чот тыршыман.

Светлана Кушакова

Добавить комментарий