Серлагышем

Зоя Дудина

Серлагышем — чонем сӧрвалышем,
Мый ятыр тыйым вургыжтарышым.
Келесыр ой денат сӧрасышем,
Ош кечым тый дечет мый арышым.
Могай тыматле, чытыше улат! —
Ош суксо гай йырем чоҥештылат,
Кунам осал вий тумасен урла,
Йырем аралтышым оҥгештылат.
Камвочмо годым кидым шуенат,
Почаҥме годым вийым пуэнат,
Чыла удажым ӧрдыж шуенат,
«Илаш! Илаш!» — мылам тый шӱденат.
Илаш… Молан арам так ойлышташ?
Сайрак вет чыным вигак каласаш:
Перненыс йылтак йӧрдымо лияш,
Ты илышлан «от кӱлымат» колаш.
Тунам, тунам лач икымше гана
Мый шижым лош рӱпшалтше кумылет,
Тыге рӱпшен мыйым авам гына…
Тыге авам гына… Тый умылет?..

19 март 2002

Добавить комментарий