Юрист лияш шонен, а толын журналистикыш

Игорь Таныгинын кутырымыжым «Марий Эл Радиошто» чӱчкыдын колаш лиеш. Моткоч писын ойлен моштышо качымарий шуко еҥлан келшен шинчын. Самырык гынат, калык денат йылмым муын мошта. Икманаш, молодец рвезе.

— Игорь, университетыште веле тунемат, тыгодымак палыме журналистыш савырнен шуктенат. Тый тышке чон йодмо почеш толынат але шоныдымын-вучыдымын логалынат?

— Такшым йоча годсек юрист лияш шоненам, закон деке шӱмаҥынам. Индешымше класс гычак Российын да Марий Элын Конституцийыштым шымлен шогенам, акт ден закон-влакым эре эскеренам. Тыге 11-ше класс деч вара Марий кугыжаныш университетын юридический факультетышкыже тунемаш пураш шоненам. Но ялысе рвезылан нелырак лийын, баллым поген шым керт. Тунам эше кок вариант лекте: историй але журналистика факультетлашке пураш. Тушко балл ситен. Но ик йолташем журналистикыш каяш темлыш, да мый кӧнышым.

— Тый тений кокымшо курсым веле пытаренат. «Марий Эл Радиошто» ыштет. Кузе тушко логалынат?

— Тунемаш пурымеке, ик преподаватель вигак практикылан верым кычалаш тӱҥалза мане. А мемнан ялыште «Марий Эл Радиом» пеш колыштыт. Садлан тушко миен толаш шонен пыштышым. Мыйым эн ондак практикыш нальыч, уверым кусараш ӱшанышт. Вара интервьюм налаш колташ тӱҥальыч, а кеҥежшылан вияш эфирышкат луктыч.

— Тылат могай программа-влакым вӱдаш келша?

— Шке ийготан-шамычын проблемышт лишыл, палымемат шуко, садлан лач самырык да йоча-влаклан келшыше программым ямдылем. Передачышкем тӱрлӧ специалистым ӱжам, каҥашым пуэна, туныктена.

— А ялыштет тыйым колыштыт? Уремыште палат мо тыйым?

— Икте сай огыл, мемнан йӱкнам колыт, а шкенам чылан огыт пале. Садлан южгунам тидын шотышто чаманенат колтем. А тыгеже ялыштем авам, палымем-влак передачем-влакым эре колыштыт.

Игорьлан пашаштыже чыла сайым гына тыланена. Журналистика корныш шогалынат гын, тышеч ит кораҥ да шокшым кергалтен тырше. Тунем, кычал, тунам тыйым калык пагалаш да йӧраташ тӱҥалеш.

Ирина Степанова

Авторын фотожо

Добавить комментарий