Шкем шуарыме пагыт

«Кугарня» газет редакцийыште журналист семын пашам ыштыме жапым пиаланлан шотлем. Мый гына огыл, очыни, тунамсе кугарнязе-шамыч чыланат шкеныштым пиалан семын шижыныт: вет самырык лийынна, йоҥылышым ыштен тунемынна, вуйлатышына Александр Абдулов пелен «Ме чыла кертына!» манме ӱшан озаланен. Илен-толын, шеҥгек савырнен ончалмек, умылет: чылаж годым чын лийын огынал гынат, тунамсе пагытлан ни ӧпке, ни иралтмаш уке. Мӧҥгешла, тауштыме веле шуэш!

Агитбригада пасу пашашке лектын.2002 ий март гыч 2003 ий май марте «Кугарня» газетын тӱҥ редакторжылан ыштышым. Тунам печать отрасльыште моткоч шуко умылыдымаш лектеден. Мутлан, «Кугарня» газет редакций негызеш молодёжный газет-влакын издательский пӧртыштым ыштынешт ыле. Тиде шонымаш дене марий газет редакцийын директоржылан Андрей Дьячковым конден шындышт. Ятыр торешланыме, умылтарыме. Шонымашыштым шыҥдараш «Молодёжная жизнь в Марий Эл» газетым лукташ оксамат муыч, да тиде газет кызытат «Марийская правда» газет пелен савыкталтеш, но меже чын лийынна – кок тӱрлӧ йылме дене иканаште кок газетым лукташ шотлан ок тол.

«Кугарня» эреак калык дене пырля. Окса чӱдылык шыгыремден гынат, «Воштылаш, товатат, сулык огыл» шоу-конкурсым нигунам ӧрдыжкӧ шӱкалме огыл. Мыйын годым идалыклан кок гана эртараш перныш. Пайрем пайрем дене, но тыгодымак редакцийыште илыш шолын: компьютер шаланылын, «келшыдыме» материалым печатлымылан кӧра иктышт вурсеныт, а весышт моктеныт, пӧръеҥ журналист-влак «йомын пытеныт», кугарнязе-ӱдыр-шамыч ешым погеныт, азам ыштеныт… Таум каласем Анфиса Эмановалан, Зоя Тимофеева-Висвислан, Ирина Степановалан, Татьяна Егошиналан, Алевтина Русановалан, Зинаида Шабалиналан тудо жапыште пырля куаным-ойгым пырля пайлымылан.

Оҥай, шке вийым тергыме, йӱд омым коден тургыжланыме, еҥ-влакым пашашт да поступкышт дене аклаш тунемме,  вуйлатыше семын шуаралтме идалык – теве тыгай акым пуэм кызыт. Уэш каласем: ни ӧпке, ни чаманымаш уке. Мӧҥгешла, тауштем!

Лидия Семёнова, «Кугарня» газетын ончычсо тӱҥ редакторжо, кызыт – «Ямде лий» газетын тӱҥ редакторжо

Добавить комментарий