Морко мастар-влак пайремленыт

Морко кундем кидмастарже-влак денат тӱняште сайын палыме. Морко калыкын вургемже шуко йот элышке шарлен. Шукерте огыл районысо калык усталык, тӱвыра да каныме рӱдерыште национальный вургем пайрем эртыш.

Сценыште ик коллектив весым алмаштен, кажныже шке ямдылыме вургемже дене палдарен да муралтен, семӱзгар дене шоктен, кушталтен, шке мастарлыкшым ончыктен. Пайрем концертым Арын вел Чодыраял гыч «Тӱрлемӱдыр» студийын участникше-влак почыныт. Нуно кугезе-влакын «Латкок ӱдыр тӱрым тӱрлат» мурыштым муралтен, тӱрым тӱрлен, вынерым кырен, сценкым ончыктеныт. Шеҥше ден Унчо вел кидмастар-влак ожнысо да тачысе кечылан келыштарыме марий чиемым ончыктеныт. Тат-Кушна клубын коллективше татар калыкын вургемже дене палдарен. Кужер клубын да «Нижний Новгород Газпромтрансгаз» ушем филиалын коллективше-влак руш ӱдырамашын образшым вургем гоч почын ончыктеныт. Сценыште йочасадыш коштшо, школышто тунемше да кугыеҥ-влак чыланат кугезе-влакын йӱлаштым ончыктен, муралтен-чӱчкалтеныт.

Добавить комментарий