Мланде яра пуалтеш

Республика мучко шуко шочшан еш-влаклан пӧртым чоҥаш 15 сотык мландым яра пуаш тӱҥалыныт. Йошкар-Олаште илыше ача-ава-влак кодшо кечылаште Медведево район, Семёновка села деч 7 километр тораште верланыше Апшакплак ялыш миен толыныт да ойырымо кумдыкым онченыт.

Чоҥымо паша, архитектура да жилищно-коммунальный озанлык министерствын специалистышт нунын дене пашам кушеч тӱҥалме шотышто мутланеныт, «Мариэнерго» да «Марийскгаз» акционер ушемын пашаеҥышт дене пырля шуко йодышлан вашештеныт. Чодыра озанлык министерство кажне чоҥышылан 70 кубометр чодырам яра пуа, но тудым шке пӱчман. Кугыжаныш пого министрын алмаштышыже Алексей Плотниковын ойлымыж почеш, еҥ-влак шке участкыштлан тунам оза лийыт, кунам пӧртын негызшым ыштен шуктат. Марий Элыште пӧртым чоҥаш мландым налаш кумылан-влак шукын улыт, пытартыш жапыште гына 1 тӱжем утла йодмашым возеныт.

Добавить комментарий