Пудыргышо люстра пиалым конда мо?

Шкетан лӱмеш Марий национальный театрын усталык коллективше у спектакльым ямдыла. Татар драматург Ильгиз Зайниевын «Люстра» пьесыже почеш шындыме «Поро пошкудо – пел кудо» комедийым лишыл жапыште ужын кертына.

Сюжетше тыгайрак. Марс лӱман корно пашаеҥын илаш пурымо пачерыштыже тувраш гыч люстра пуреҥгая. Тидлан пеш чот сырыше пӧръеҥ кӱшыл пачашыште илыше пачер омсаш йыҥгырта. Библиотекыште пашам ыштыше Эльфа лӱман ӱдырамаш дене вашлиймаш мом сӧра? Пӧръеҥ ден ӱдырамаш коктынат 40 ийым эрталтеныт. Нунын коклаште йӧратымаш лийын кертеш мо?

Ильгиз Зайниев – самырык драматург, Татар кугыжаныш академический театрыште пашам ышта. 2008 ийыште Озаҥысе тӱвыра да сымыктыш университетыште тунем лектын, ӱмаште Горький лӱмеш Литературный институтым пытарен. Тудын возымо пьесыже почеш Татарстан ден Башкортостаныште ятыр театрыште спектакль-влак шындалтыт. Кызытсе татар драматургийым вияҥдымаште надыржылан Ильгиз Зайниевлан 2009 ийыште Мусса Джалиль лӱмеш Татарстан Республикын премийжым пуымо.

Добавить комментарий