Репрессий пагытым шарныктыше тоштер

9 майыште Йошкар-Олаште ГУЛАГ-ын тоштерже почылтын. Тудо Булыгин купечын ончычсо оралтыштыже вераҥын. Лач тушто шке жапыштыже НКВД лийын, репрессироватлыме еҥ-влакым кученыт да орландареныт.

Политический репрессийыш логалше-влакын праваштым аралыше «Мемориал» обществым вуйлатыше Николай Аракчеев тыге ойлен: «Мемнан дене тыгай тоштерым почаш чыла амал уло. Сталин жапыште Марий Элыште репрессироватлыме-влак радамыш 40 тӱжем еҥ логалын. 16 тӱжем еҥым кулаклан шотлен поген наҥгаеныт, нунын кокла гыч 7 тӱжем еҥже увер деч посна йомын. Шукыштым Йошкар-Ола пеленсе Тумер, Шопкер да Пӱнчер отылашке шолып луктын тоеныт». Тачысе кечылан тоштерыш 4 тӱжем экспонатым погымо. Тиде – документ, фотографий, репрессироватлыме-влакын чиемышт да молат.

Добавить комментарий