Эрге олмеш шкежак водитель лийын

Советский межрайонный следственный отдел гыч увертарат. Тыште пашам ыштыше следователь-влак «Кужмарий ял шотан илем» вуйлатыше Иван Янцев шотышто уголовный пашам тӱҥалыныт. Тудым уголовный кодексын 292 статьяжын 1 ужашыже почеш титаклат.

Следователь-влакын ойлымышт почеш, администраций вуйлатыше 2010 ий январьыште шке эргыжым водительлан пашаш налын, тыгодым тудыжо кече мучко школышто лийын. Ӱмаште январь гыч тений январь марте администраций вуйлатыше машина дене шкеже кудалыштын, а пашам ыштыме жапым шотлымо табельыште шоя уверым возен. 57 тӱжем теҥге пашадарым эргыже олмеш шкеже налын. Кызыт следователь-влак чылажымат рашемдаш тыршат.

Добавить комментарий