Лӱмгечым палемденыт

Марий юмыйӱла ушемым чумырымылан 20 ий темын. Тидын вашеш 30 апрельыште Йошкар-Олаште, Мер-политика рӱдерыште онаеҥ-влак чумыргеныт. Ыштыме пашам ончалын, ончыкылыкым рашемденыт.

Марий йӱлан уэмдалтше пагытше 1991 ий апрельыште почылтын. Тунам Кугыжаныш секретарь Николай Фёдорович Рыбаков ты пашалан икмыняр еҥым кумылаҥден: Василий Васильевич Ивановым, Алексей Изергиевич Якимовым, Михаил Егорович Шиляевым. Нине кум еҥ кажне кундемлашке увертарымашым колтеныт да карт кугыза-влакым погеныт. Тӱшка ой дене марий юмыйӱла ушемым ышташ пунчалыныт, тудлан «Ош Марий – чимарий» лӱмым пуэныт.

Добавить комментарий