Иканаште кок лӱмгече

27 апрельыште Звенигово район, Чакмарий селаште транспортно- энергетический техникум шкенжын 35 ияш лӱмгечыжым палемдыш.

Лач тиде кечын 1976 ийыште тыште 13 № СПТУ-м почмо. Училищын икымше директоржылан Николай Георгиевич Андреев пашам ыштен. А 1978-ше гыч 2001 ий марте тиде тунемме верым Александр Николаевич Ураков вуйлатен. Тудын жапыште шуко чоҥымо: тунемме да лабораторный корпусым, 100 вуй сӧснам ашныме вӱтам, кугу склад ден пареҥгым аралыме нӧрепым, сотрудник-влаклан илыме пӧртым да молымат. Тылеч вара директорлан шогалше Андрей Николаевич Новокшоноват ятыр сай пашам ыштен. 2009 ий 15 июль гыч тиде тунемме верым техникумыш савырыме. Кызыт тыште шуко профессийым налаш лиеш: электромонтёр, машинам олмыктышо техник, автомеханик, продавец, контролёр-кассир, каменщик.

А 29 апрельыште Звенигово интернат школым почмылан 50 ий темын. 1961 ийыште коллективыште улыжат 56 еҥ лийын, тышеч колыжо – туныктышо ден воспитатель-влак. Тиде интернат школ санаторий семын пашам ышта. Тыште туберкулёз черан йоча-влак тунемыт да эмлалтыт. Пел курым жапыште тӱҥ образованийым налме нерген аттестатым 1000 утла ӱдыр-рвезылан пуымо.

Валерий Очеев

Добавить комментарий