Театральный Йошкар-Ола

Республикыште «Театральный Йошкар-Ола» фестиваль тӱҥалын. Тиде фестиваль 2 ийлан ик гана 1994 ий гыч погына. Республикын профессиональный коллективше-влак сценыш кажне гана у спектакльым веле луктыт. Режиссёр, артист ден сценограф-влакын пашаштым тӱвыра министрын алмаштышыже Владимир Актанаевын вуйлатыме жюри аклаш тӱҥалеш. Тений нунылан Санкт-Петербург ола гыч толшо театр критик Мария Смирнова-Несвицкая полша. Театр коллектив-влак 17 спектакльым ончаш темлат. Фестиваль 24 мартыште гала-концерт дене мучашлалтеш, тунамак Йыван Кырла лӱмеш премийын 16 лауреатшым пален налына.

Валерий Очеев

Добавить комментарий