«Йыван Кырла лудмаш»

Шернур посёлкысо 2 № школышто «Йыван Кырла лудмаш» II шанче-практик конференций лийын. Тушко учёный, преподаватель, аспирант ден студент-влакым ӱжмӧ. Нуно тӱрлӧ йодышым шымленыт: марий йылмым школышто туныктымаш, марий сылнымутын вияҥмыже, краеведений, регионысо историй, театр искусство, актёр мастарлык да молат.

80 утла участник секций еда шелалтын пашам ыштеныт. А эрла Йошкар-Олаште, Мер-политик рӱдерыште Марий юмыйӱла ушемын 20 ияш лӱмгечыжлан пӧлеклалтше мероприятий лиеш. Тыштак йыргешке ӱстел погына. Марий кундемын историйыштыже ӱдырамашын рольжо нерген мутланаш тӱҥалыт. 16 шагатлан Эрик Сапаев лӱмеш опера да балет театрыште композитор Элина Архипован авторский концертше тӱҥалеш. Тушто «Марий мландылан моктеммуро» ораторийын премьерыже лиеш.

Валерий Очеев

Добавить комментарий