Ялыште – пейнтбол

Параньга районышто предприниматель Д.Норин але марте палыдыме спорт модышлан калыкым кумылаҥдаш йӧным муын.

Ялыште илыше-влак кокла гыч шукынжо, пейнтбол мутым колын, очыни, ӧрын колтат: мом тудо ончыкта? Южо еҥже колын гынат, тӱрысшӧ садак ок умыло. А теве весышт ты модыш дене модын онченыт веле огыл, эсогыл тудын дене шке бизнесым кылдаш кумылан улыт.

Лач тыгай модышым Параньга поселкышто илыше Денис Норин шке бизнесшын негызшылан налын. Икана тудо Йошкар-Олаште «Солдат удачи» пейнтбол клубышто лийын,  да ты модыш тудлан моткоч келшен. Вара шоналтен: а молан тыгай клубым шкенан районышто почаш огыл? Тудо жапыште самырык еҥ пашам ситарыме рӱдерыште учетышто шоген. Но у пашалан пижаш тӱҥалтышлан окса кӱлын. Рӱдерын специалистше-влак тудлан бизнес-планым ямдылаш полшеныт. Тыге 58,8 тӱжем теҥгем налын. Тиде да шкенжын шапаш оксаж дене Тоштыялыште мландым арендыш налын, беседкым чоҥаш материалым конден. Тыгак Озаҥ-ыште кӱлшӧ оборудованийым налын. Телым чоҥымо пашам вияҥдаш йӧн лийын огыл, а теве лум каен пытымеке, предприниматель тӱҥалме пашам умбакыже шуя. Варажым Норин тыштак эше мончам чоҥынеже.

Республикынан эрвел-йӱдвел кундемыштыже кызытеш тыгай клуб уке. Тугеже пошкудо районла гычат тышке канаш толаш кумылан-влак лектыт.

В.Смоленцев

Авторын фотожо

Добавить комментарий