ЕГЭ-м жап деч ончыч ик еҥ куча

20 апрельыште палемдыме жап деч ончыч экзаменым  кучаш праван еҥ-влаклан ЕГЭ форман кугыжаныш  (итоговый) аттестаций тӱҥалын.

Тений Российыште тыгай радамыште 1,3 тӱжем еҥ погына. Ӱмашсе да ончылийсе дене таҥастарымаште цифр тунаржак вашталтын огыл.

Тыгай Единый кугыжаныш экзаменым кучышо-влак коклаште эн шукынжо (450  еҥ) биологий предметым ойыреныт, кокымшо верыште — обществознаний. 2011 ийыште физика историйым «эртен».

Марий Элыште ЕГЭ-м палемдыме жап  деч ончыч тений ик еҥ (Килемар район гыч) куча. 20  апрельыште тудо руш йылме дене экзаменым кучен. Кызыт математика дене ЕГЭ-лан ямдылалтеш,  тудын дене экзамен 25 апрельыште лиеш.

— ЕГЭ-м палемдыме жап  деч ондак кучышо мемнан республикыште тылеч ончыч лийын огыл. Тиде еҥ — икымше. Тыгай йӧн дене кужу жаплан эмлалташ кайымыжлан кӧра экзаменым куча, — каласышт республикысе Образований качество шотышто аттестаций да контроль рӱдерыште.

Ушештарена,  ЕГЭ-н икымше толкынжо 27 майыште тӱҥалеш. Ты кечын тунемше-влак биологий, информатика да математика дене экзаменым кучат.

Г.Кожевникова

Добавить комментарий