Кӧн мӱкш отарже эн чапле?

«Марий Эл» газет шке лудшыжо-влак коклаште «Мӱкш отар» конкурсым увертара. Тудо тений кеҥежым эртаралтеш да шыже тӱҥалтыште иктешлалтеш.

Условийже тыгай: конкурсыш ушнаш шонышо мӱкшызӧ тенийсе кокымшо пелийлан «Марий Эл» ден «Суртпече» газет-влаклан подпискым ыштышаш. Вара редакцийыш серышым возен колтышаш (адресше, фамилийже, лӱмжӧ, ачалӱмжӧ, телефон номерже) але журналист Вячеслав Александрович Смоленцевлан (8362) 45-11-19, 70-63-32 номеран  телефон дене йыҥгыртышаш. Конкурсыш Марий Эл деч ӧрдыжсӧ марий-влакат ушнен кертыт.

Конкурсым эртараш да тушко ушнышо мӱкшызӧ-влакын пашаштым аклаш жюрим ыштыме. Тушто мӱкш ончымо пашам сайын палыше специалист, кугу опытан мӱкшызӧ да журналист-влак улыт. Нуно шке отарым кучышо оза-влак деке июльын кокымшо пелыж гыч мияш тӱҥалыт.

Эн сайлан шотлымо отар-влак окса приз дене палемдалтыт. Икымше вер — 10 тӱжем теҥге, кокымшо — 5 тӱжем да кумшо вер — 3 тӱжем теҥге. Тыгак кумылаҥдыше икмыняр приз лиеш.

Конкурсын тӱҥ шонымашыже — мӱкш ончымо пашам утларак ворандарен колташ, сай опытым шымлаш да шараш, мӱкш продукцийым ужалыме йодышым тӱшкан рашемдаш полшаш, тыгак мӱкшызӧ-влакым  марий газетым утларак лудаш кумылаҥдаш.

Жюрин мом аклымыжым ушештарена: мӱкшызын отарже могайрак, могай опытшо уло, шинчымашым кузе нӧлта, шыркам, прополисым ямдыла мо, шыштым кузе пелта, мӱйын качествыже могай, тудым кушко ужала, мӱй пӱрым кузе ямдыла (тудын куатшым жюри член-влак аклат) да молат.

В.Смоленцев

Авторын фотожо

Добавить комментарий