«Сылнымут шошо-2011» семинар эртен

Апрель тылзе кыдалне Морко район Валентин Колумб лӱмеш Волаксола школышто «Сылнымут шошо-2011» семинар эртыш. Районысо чыла школ гыч сылнымут шӱлышан тунемше ден туныктышо-влак погыненыт. Волаксола школын тунемшыже-влак шочмо йылме нерген композицийым ончыктеныт. Варажым кум секцийыште паша гӱжлен.

Мучашлан, актовый залыш погынен, секцийым вӱдышӧ-влак эртарыме пашаштым иктешленыт. Почеламутым возымо мастарлык дене поэт Альберт Васильев палдарыш. Ойлымашым чын чоҥаш Кокласола лицейын туныктышыжо, «Ямде лий» газетын почётный юнкоржо Вячеслав Смирнов туныктыш. Марий йылмыш пурышо у мут-влак, шанчызе-влакын шонкалымашышт дене Марий Эл газетын собкоржо Анатолий Титов палымым ыштен.

Валерий Очеев

Добавить комментарий