Коллектор организаций-влакын оксам кычалме пашам шукташ лицензийышт уке

Банкыште кредитым налше да тӱрлӧ амал дене окса жапыштыже тӱлен шуктыдымо еҥ-влаклан кызыт коллектор организацийла гыч телефон дене йыҥгырташ тӱҥалыныт да, кугу штраф дене лӱдыктен, оксам пӧртылташ йодыт.

Мутлан, «Ренессанс Капитал» банк коллекторский структура-влак полшымо дене пашадыме ӱдырамаш деч 400 тӱжем теҥгем кӱрын лукнеже. Тиде ӱдырамаш ала-кунам 100 тӱжем теҥге кредитым налын улмаш. Черле йочан ӱдырамашым тӱрлӧ семын лӱдыктылын, парымым пӧртылташ пачержым ужалыктынешт. Потребитель-влакын праваштым аралыше-влак тыге умылтарат: кредитым налше еҥ ден банк кокласе пашам вес организаций тӧрлен огеш керт, чылажат суд почеш шотыш кондалтеш. Коллектор организаций-влакын оксам кычалме пашам шукташ лицензийышт уке, сандене нунын дене нимогай кутырен келшымаш лийшаш огыл.

Валерий Очеев

Добавить комментарий