Генерал-влакат экзаменым кучен огыт керт

Милиций гыч полицийыш пашам ышташ куснымо годым чыла сотрудник-влак аттестацийым эртат. Тыгодым генерал-влакат экзаменым  кучен огыт керт. Россий президент Дмитрий Медведев шкенжын распоряженийже дене эше 7 генералым пенсийыш колтен.

Нунын коклашке Моско ОМОН-ым вуйлатыше генерал-майор Вячеслав Хаустов логалын. Тиде арняште гына президент министерствын пеш шуко офицержым паша гыч кораҥден.

«Маяк» радиостанцийын уверже почеш, милицийын вуйлатыше органжын визымше ужашыже аттестацийым огеш эрте. Элкӧргӧ паша министр Рашид Нургалиев тыге каласен: «Кызыт 200 вуйлатышым аттестоватлыме, нунын кокла гыч 94 еҥым президентын указше дене тӱрлӧ должностьыш шогалтыме.

Валерий Очеев

Добавить комментарий