Тазалыкым аралыме министерстве палдара

Тазалыкым аралыме министерствын пресс-службыжо палдара: ӱмаште республикыште амбулаторий да поликлиника службын 600 утла пашаеҥжын пашадарышкышт ешарен тӱлымӧ кугытым иземдыме. Но тышке эше шым район да 1-ше медсанчастьын поликлиникыштыже пашам ыштыше-влакым пуртымо огыл.

Участковый врач, медсестра, медпунктын пашаеҥже-влаклан ешартыш оксам тӱлаш тӱҥалмеке, нунын деч кызыт моткоч шуко йодыт. Кагаз пашажат ятыр. Иктаж-мом ыштен огыт шукто гын, ешартышым тыманмеш иземдат. Мутлан, участкыште чыланжак вакцинацийым, флюорографий тергымашым эртен огытыл, диспансеризаций дене еҥ-влакым авалтен шуктымо огыл – чыла тидыже ситыдымашлан шотлалтеш. Козьмодемьянск больницыште гына 266 медпашаеҥын ешартышыжым иземдыме. Медведево рӱдӧ райбольницыште 111 медик кугурак пашадар деч посна кодын. Йошкар-Оласе 2-шо номеран поликлиникыште – 69 еҥ. Но чыла тидыже шонаш тарата: оксам иземдымаш пашам саемден колташ полша мо? Чыла нине медик иканаште паша гыч каяш йодмашым возат гын, тунам мемнам кӧ эмлаш тӱҥалеш? Чынжымак, кугу йодыш.

Валерий Очеев

Добавить комментарий