Ната Бабушкинам шарныме мероприятий эртен

Теҥгече Йошкар-Олаште, Совет да Волков урем коклаште верланыше Ната Бабушкина лӱмеш скверыште тудым шарныме мероприятий эртен. Надежда Васильевна Бабушкина 1915 ий 14 мартыште Кострома олаште шочын. 1935 ийыште 5 йолташ ӱдыр дене пырля 7035 метр кӱкшыт гыч парашют дене тӧрштен. Тиде тӱнямбал рекордлан спортсменке-влакым Йошкар Шӱдыр орден дене наградитленыт. 1936 ийыште Ната Бабушкинам Йошкар-Олашке, Марий автоном областьын 15-ше лӱмгечышкыже унала ӱжыныт. 24 июньышто тудо парашют дене тӧрштен, но парашютшо мланде деч 40 метр кӱкшытышто веле почылтын. Тыге ӱдыр чот эмганен да 3 кече гыч колен. Тудын капшым Москваште, Новодевичий шугарлаште тойымо. Тудын лӱмжым нумалше скверыште Ната Бабушкиналан памятникым 1958 ийыште почмо.

Валерий Очеев

Добавить комментарий