МВД пашаеҥ-влак колым кучымо годым законым пудыртылмашым тергат

Республикыште «Нерест – 2011» профилактика операций эрта. 15 июнь марте МВД пашаеҥ-влак колым кучымо годым законым пудыртылмашым тергат. Нунылан ГИБДД пашаеҥ-влак полшат: автотранспортым эскераш тӱҥалыт. МВД пресс-службын увертарымыж почеш, Йошкар-Оласе Рӱдӧ пазарыште да моло верлаште могай свежа колым ужалымым тергыме годым рак-влакым да 60 кг утла нужголым, одыголым (судакым) да шереҥгым поген налме.

Колым ужалыше-влакын нимогай документышт лийын огыл. Шижтарена: колым аралыме законым пудыртымылан посна еҥ-влак 1000 гыч 1500 теҥге штрафым, должностной еҥ-влак – 2 гыч 3 тӱжем марте, а юридический лица-влак 20 гыч 30 тӱжем теҥгем тӱлаш тӱҥалыт.

Валерий Очеев

Добавить комментарий