«Чолман» газетлан 20 ий темын

Башкортостан Республикыште марий йылме дене «Чолман» газетын лекташ тÿҥалмыжлан 20 ий темын. Шÿдö утла тÿрлö национальностян калык илыман кундемыште лекше тиде газет эрвелмарий-влаклан илышын вÿршерже дене иктак. Марий калыкнан йылмыжым, культурыжым, йÿлажым аралымаште чот тырша, самырык-влакым шочмо калыкын патриотшо лияш туныктен кушта.

Тыге Пошкырт кундемын 54 районжо да кумда Россий мучко шаланен пытыше эрвел марий-влакым келшен илыше ик ешыш уша. «Чолман» газет тÿрлö саман годсо илыш йыжыҥла гоч вончен толмаште ятыр тура савыртышым, тергымашым чытен лектын. Но тудо эре яндар ончалтышан, поро шÿм-чонан, мотор марий йылман кодын. Арня еда лектын шогышо газет ий гыч ийыш кÿжгö книгаш чумырга, эрвел марий-влакын историйжым возышо шкешотан летописьыш савырна.

Валерий Очеев

Добавить комментарий