«Чын» кичкым налза

Сай озавате-влак пакча саска кичкым телымак ситареныт, но мланде почылтмо марте налде кодшыжат шукын улыт. Сандене тиде увер чылаштлан пайдале лиеш.

Пытартыш жапыште пеш чӱчкыдын тыгай вашлиялтеш, кунам кичке огеш шыте, кагаз атышке тудым пеш шагал пыштат, ик саска олмеш вес кичкым оптат. Южгунам кешыр манын ӱдымӧ йыраҥыште укроп кушкын шогалеш. Тидым шотыш налын, ветеринарный да фитосанитарный надзор шотышто федеральный службын Угарман областьысе да Марий Элысе управленийжын специалистше-влак кеч-могай кичкым налме годым ида вашке маныт.

Кагаз пакетыште тыгай увер возымо лийшаш: кичкым ямдылыше фирмын адресше да телефонжо, могай пакчаска, могай сорт, партийын номерже, пакетын нелытше але мыняр кичке уло, ужалыме жап. Тылеч посна ужалыше-влакын кидыштышт кажне кичкылан «Качество сертификат» да «Свидетельство» лийшаш, «тыгай кагаз оза дене але офисыште» маншаш огытыл. Документым йодаш ида вожыл, вет тушто кажне кичкын ӱдымӧ пагытшым ончыктымо.

Валерий Очеев

Добавить комментарий