Эн ончылно — Йошкар-Оласе тунемше-влак

Тунемше-влаклан Россий кӱкшытан олимпиадын региональный этапше шеҥгелан кодын. Тиде кечылаште Йошкар-Оласе 28-ше номеран лицейыште эн келге шинчымашым ончыктышо ӱдыр-рвезе-влакын лӱмыштым палемдыме.

Тенийсе олимпиадыште 733 тунемше 21 предмет дене шинчымашым терген, тышеч 157 еҥ сеҥыше да призёр радамыш лектын. Эн шуко медальым (64) Йошкар-Оласе общеобразовательный учрежденийлан тунемшыже-влак сеҥен налыныт. Кокымшо верыште — Морко кундемын ӱдыр-рвезыже-шамыч. Чылаже нунылан 10 медаль логалын. Мо эн кугешнаш таратышыже: тышеч кудытынжо Коркатово лицейын тунемшыже улыт. Кумшо верыш Волжск оласе общеобразовательный учрежденийысе тунем­ше-влак лектыныт, нунын коклаште чылаже лу еҥ призан верым сеҥен налын.

А чыла тунемме учрежденийым ончалаш гын, тыгай сӱрет палдырнен: эн сай шинчымашым республикысе Политехнический интернат-лицейын, Йошкар-Оласе 28-ше номеран лицейын, А.Пушкин лӱмеш 4-ше номеран гимназийын да Бауманский лицейын ӱдыр-рвезыже-влак ончыктеныт.

Г.Кожевникова

Д.Речкинын фотожо

Добавить комментарий