Поро йÿла ылыжеш

31 мартыште  К.Иванов лӱмеш Чуваш кугыжаныш академический драма театрыште Чуваш Республикыште Марий театрын кечыжлан пӧлеклалтше пресс-конференций эртен.

Тыште  верысе журналист-влак дене М.Шкетан лӱмеш Марий кугыжаныш драма театрын тӱҥ режиссёржо Р.Алексеев, артистка-влак М.Медикова, «Вучо, мане, пӧртылам» спектакльыште тӱҥ роль-влакым модшо артист-влак С.Строганова, С.Данилов, А.Егошина, Чуваш драма театрын художественный вуйлатышыже В.Яковлев да ты театрынак тӱҥ художникше Ю.Матросов вашлийыныт.

Пресс-конференцийым почшыжла, Чуваш Республикын калык артистше Валерий Яковлев Марий Элыш (тунам але Марий АССР) икымше гана гастрольыш толмышт нерген ойлен. Тиде 1975 ий шошым лийын, игече ударак лиймылан кӧра чуваш артист-влак АН-24 самолёт дене чоҥештеныт.

Чуваш драматический театрыште марий автор-влакын произведенийышт почеш шагал огыл спектакльым шындат, тыгак Марий театрыштат чуваш драматург-влакын пьесышт дене пашам ыштат. Мутлан, шке жапыштыже марий ден чуваш артист-влак Н.Айзманын «Кай, кай, Йыванлан» да А.Чебановын «Проска кока ӱдыржым марлан пуа» спектакль-шамычым шынденыт. «Марий драматург Арсий Волковын «Оръеҥ мелна» комедийже почеш шындыме шӱдӧ лумшо юбилейный спектакльнам 21 апрельыште Марий театрын сценыштыже ончыктена,— увертарен Валерий Николаевич.— Кок театрынат нелылык икгаяк: национальный драматург-влак огыт сите. Возышо драматург тиде паша дене гына ешым пукшен луктын ок керт».

Театрнан тӱҥ режиссержо Роман Алексеев марий драматургын пьесыж почеш Чуваш театрын шындыме спектакльым Йошкар-Олаште ужаш моткоч кугу куан манын палемден.

— Чуваш театрын режиссёржо Николай Корчаков мемнан дене чӱчкыдынак уна лийын, театрнан историйыштыже пале кышам коден,— ойлен Роман Юрьевич.— Кызыт ме «Кай, кай, Йыванлан» пьеса почеш спектакльым шындаш ямдылалтына.

Тыгак Марий театрын школышто тунемше-влак, ончыкылык зритель-влак, дене пеҥгыде кылже улмо нерген каласкалыме. Марий Эл Республикын Образований да наука министерствыже тидын шотышто полша. Марий калыкын илыш-йӱлажым арален кодымо, вияҥден колтымо шотышто театр рушла да марла кок программым тудын полшымо денак ямдылен.

Кок театр коклаште кылым ончыкыжым эшеат пеҥгыдемдыме, ваш-ваш унала чӱчкыдынрак кошташ тӱҥалме нерген кутырен келшыме.

shketan.ru

Добавить комментарий