Шошо толын?!

Тудым чыланат вученна. Апрель (вӱдшор) тылзе шкенжыным налеш. Чыла вере лум шула, корныштат, кудывечыштат вӱд ташла, лавыра лум немырлан кӧра  машина дене кудал эрташат, йолын ошкыл колташат куштылго огыл.

Лумлан поян тыгай теле деч вара ӧраш нимолан. Кугурак уремлаштыже машина-влаклан кудал колташышт куштылгырак, но изирак ерым ушештарыше ташлыше вӱд тургыжландара.  Тудыжо йолешке-влаклан поснак кугу лӱдыкшым ышта. Вет машина орава йымач шыжалт лекше вӱд дене чывылталташ огыл манын, уремым вончымо годым мучашдыме машина тӱшка эртымым кужун вучен шогаш перна. Тыгай туткар деч вӱд  йоген каяш келыштарыме вер-влакат утарен огыт керт. Вет нунышт чӱчкыдынак погынышо шӱк дене петырналтыт.  Адакше тыгай йӧнештарымыжат чыла вережак уке.  Тидлан кӧра  корнышто ер да лакыла шочыт.

Рӱдӧ урем ден бульвар-влакат лум немыр коклаште йомыныт гын, ола тӱрысӧ изурем нергенже мом олаш! Резинке кем таче оласе калыкын  йӧратыме йолчиемышкыже савырнен. Тудо эн чапле итальян кем дечат модныйрак.

Денис Речкин

Авторын фотожо

Добавить комментарий