Мариец посёлкышто пожар клуб ден библиотекым пытарен

Марий Турек районысо Мариец посёлкышто январьыште лийше пожар клуб ден библиотекым пытарен. Верысе калык театр ден хорын костюмжо-влак, сценысе реквизитышт йӱлен, а лудаш йӧратыше-влак книга деч посна кодыныт. Но районысо тӱвыра пашаеҥ-влак шке коллегыштым ойго дене иквереш коден огытыл. Библиотеке-влак книгам кондат, еҥ-влакат мӧҥгышт гыч нумалыт.

Район администраций полшымо дене шергырак вургем ден арверым наледат. Клуб ден библиотекым кушто вераҥдыме шотыштат кутырен келшыме. Марий машиностроитель заводын 7 № производствыжо петырналтме деч вара тудын полатше ятыр жап яра шинчен. Кызыт заводын генеральный директоржо да район администраций вуйлатыше тушко тӱвыра учреждений-влакым пуртымо шотышто кутырен келшеныт.

Валерий Очеев

Добавить комментарий