Вӱдшор тылзын 7 кечыже

Рӱдоланан тӱҥ символжо могай лиеш? Кызыт Кугыжаныш Погынын депутатше-влак Йошкар-Олан гербшым каҥашат, тушко вашталтышым пуртынешт: ава шордым ӱшкыж шордылан вашталташ темлат. Тидлан посна комиссийым ыштеныт.

Ушештарем, Йошкар-Олан гербшым 2005 ийыште пеҥгыдемденыт. Кандалге тӱсан фонышто марий тӱрым сӱретлыме, тушто — ший тӱсан ава шордо, щит ӱмбалне — вич пӱян шӧртньӧ корона. У гербын икымше эскизше апрель кыдалне ямде лийшаш.

Килемарыште у пӧртым чоҥат. Лишыл жапыште тушко чодыра воктенысе ял ден посёлкыла гыч илыше-влакым кусарат. У пӧртыштӧ 84 пачер лиеш. Идалык жапыште тушто чодыра коклаште илыше тора ял шотан 5 илем гыч еш-влак пӧртсийым эртараш тӱҥалыт. Шушаш кеҥежлан пожар деч аралалташлан нине кундемлдаште посна пожарный пост-влакым почыт. Вет эртыше кеҥежым Килемар районышто илыше-влак кугу нелылыкыш логалыныт. Тидын деч посна республик мучко чодыра воктене верланыше ял шотан илемлаште 90 вере лӱдыкшдымылык зоным ыштеныт.

Тений Марий Элыште 19 пожарный постым ышташ шонат. Тушто 120 пашаеҥ тыршаш тӱҥалеш. Трук пожар тӱҥалме годым нине пашаеҥ-влак республикыште 90% территорийым авалтен кертыт. Кызыт пожарный службыш пашаеҥ-влакым погат, техникым вераҥдашлан зданий ден  подсобный помещений-влакым  ачалат. Лишыл жапыште у постлашке пожарный машина-влакым кондаш тӱҥалыт. Тидлан конкурсым увертарат. Чыла сомыллан мемнан правительство 40 миллион теҥге наре бюджет оксам  ойырышаш.

Ик ий ончыч Йошкар-Олаште Марий Элын икымше энциклопедийже лектын. Автор-влакын мутышт почеш, тиде паша – республикын визитный карточкыже. Энциклопедийым кундемнан лӱмгече идалыкыштыже савыктен лукмо. 2010 ий 4-ше ноябрьыште Марий Автономийым ыштымылан 90 ий теме. Сандене у савыктышым шкешотан символ семын аклаш лиеш. Икымше энциклопедийыште кундемнан географий картше гыч тӱҥалын тыште илыше калыкын тӱвыра ойыртемже марте чыла кӱлеш уверым муаш лиеш.

Увертарымаш. 8-ше апрельыште Йошкар-Олаште Пошкырт кундем гыч Нефтекамск кугыжаныш филармонийын «Тангаур» куштышо ансамбльже ден «У сем» марий эстрада-фольклор группын концертышт лиеш. Тудо Марий самырык театрыште  18 шагатлан тӱҥалеш.

27-ше апрельыште оласе «Стоун» клубышто Марий танцпол лиеш. Тудым Марий Эл Радио эртара. Дискотек молгунамсе семынак 8 шагат кастене тӱҥалеш.

Калык календарь ойла. Таче — 7-ше апрель, тер кудалтыме кече. Ты кече деч вара «40 йӱштӧ толеш» маныт. Калык ой почеш, 7-ше апрель марте леведыш ӱмбалне лум шулен пытен огыл гын, пасушто тудо 6-шо май марте кияш тӱҥалеш.  Тиде кечын кӱдырчӧ кӱдырта гын, кеҥеж шокшо лиеш, пӱкш сайын шочеш. Игече йӱштӧ шога гын, шыжым курезе чот шочеш. Калык ой почеш, тер кудалтыме кечын вараксим-влак огыт вычымате гын, шошо кужу да юалге лиеш. Ты кече деч вара кутко, шоҥшо, енот да нерге тӱжваке лектыт.

Алевтина Кузнецова

Добавить комментарий