Корнын кумшо ужашыжым эртыме

Теҥгече Марий Элын визымше созыв Кугыжаныш Погынжын пашам ышташ тӱҥалмыжлан 500  кече темын.

А чумыржо тудо 1811 кече пашам ышташ тӱҥалеш. Тугеже  законодательный пашан ик кумшо наре корныжо шеҥгелан кодын.

Марий парламентын латшым созывше гыч тиде созывым эн тӱвыргӧ паша саскан манын палемдаш лиеш, каласен, депутат корпусын пашаж нерген латвизымше сессийыште ойлышыжла, Кугыжаныш Погын председатель Ю.Минаков. 500 кече жапыште 15 сессийым, президиумын 36 заседанийжым, комитет-влакын 232 заседанийыштым, 19 Депутат кечым эртарыме. Депутат-влак 102 законым, 231 пунчалым  ончен лектыныт да пеҥгыдемденыт. Кугыжаныш Погын федеральный законодательствым саемдымашкат шке надыржым пышта.

Верыш лектын эртарыме мероприятий-влак  илышыш шыҥдаралтыт. Тыгодым тӱрлӧ проблемым верысе самоуправлений орган-влак дене пырля утларак келгын шымлаш да тудым решатлаш корным кычалаш йӧн лектеш. Депутат-влак чӱчкыдынак калык дене вашлийыт. Ты жапыште 3815 вашлиймаш лийын. Еҥ-влак приемышкат шукын коштыт.

Парламент-влак кокласе вашкыл дене келшышын,  Кугыжаныш Погынын депутатше-влак Башкортостан Республикын Кугыжаныш Погыныштыжо – Курултайыште, Татарстан Республикын Кугыжаныш Советыштыже, Киров областьын Законодательный Погыныштыжо да Чуваш Республикын Кугыжаныш Советыштыже лийыныт.

2009-2010  ийла ятыр событийлан поян лийын. Ик эн шарнаш кодшыжо – Марий Элын президентше должностьыш кумшо   сроклан Л.Маркеловым пеҥгыдемдымаш,  Марий Элыш Россий президент Д.Медведевын толын коштмыжо да икмыняр молат.

Кугыжаныш Погын тӱҥ задачыжлан законодательствын пайдалыкшым кугемдымым, тудын негызеш калыкын илышыжым саемден толмым шотла.

Л.Иванова

Добавить комментарий