Сӧсна шукемеш, ушкал шагалемеш

Тений кок тылзыште тӱшка озанлык-влак шылым кодшо ийысе тыгаяк жап  дене таҥастарымаште 2,3 процентлан шукырак ужаленыт.

Тыгай кӱкшытыш эн ончычак сӧсна шылым шукырак ужалымылан кӧра шумо. Вет сӧснам ӱмашсе деч латныл процентлан шукемдыме. Тыгак шорыкым да казам коло утла процентлан ешарыме. Кеч сурткайык ӱмашсе нарак уло, ужалыме чумыр шыл гыч 45 процентше — сурткайыкын. Тыгодымак ушкал шылым шагалрак ужалыме. Амалже — тӱкан шолдыра вольык шагалемеш. Таче тӱшка озанлыклаште ушкал 22,6 тӱжем вуй кодын. Февральыште кажне ушкал деч 349 килограмм шӧрым лӱштымӧ гынат, ты вольык шагалеммылан кӧра чумыр лектыш иземын. Марий Турек районышо кажне ушкал деч 549 килограмм дене шупшылмо, Медведево районышто – 445 килограммым. А У Торъял районышто лӱштыш 65 килограммлан кугемын. Тыгодымак Морко районышто 182 килограмм дене веле лӱштеныт, Шернур районышто – 201, Параньга районышто – 207 килограмм дене. Нине районлаште ты кечылаштат 7,4-8,7 килограмм дене веле лӱштат.

Шӧрым налме ак кодшо ийысе деч кок пачаш кугемын. Сандене ял калык уто шӧрым шукырак ужалаш кумылаҥын. Тыге тений 9 мартлан талук тӱҥалтыш гыч шотлымаште 1085 тонным погымо. Тидыже ӱмашсе деч кок пачаш нарылан шукырак.

В.Смоленцев

Добавить комментарий